Ecco in esclusiva per il sito www.ecodellalocride.it, la poesia “Catina Amara” dell’autore locrese Francesco Reitano che si è imposta nella XIV edizione del Premio Letterario “Giomo Trichilo” svoltosi a Siderno (Rc), lo scorso 5 agosto. Una poesia che riguarda i numerosi casi di “femminicio” che, purtroppo, e con sempre maggiore insistenza si continuano a registrare in Italia e che necessitano di una rigida e tempestiva disciplina normativa. Ma ecco la poesia:
Catina Amara
Quandu si stocca sta catina amara
‘ntrizzata d’odiu e di malignatati
c’arrusti ‘u cervellu com’a na carcara
e distruggi ‘u cori di li ‘nnamurati?
Ed una, e ddui, e tri e…n’atta ancora
Cu na sequenza ‘mprissionanti
Chi riventau oramai ‘na tristi moda;
i femminicidi sunnu veramenti tanti !
Ti vogghju beni,sugnu cott’i tia
Com’i pisci vonnu beni ‘u mari..
‘u stessu si tu ntà vita mia;
luntanu i tia..non porrìa campari
e mi ‘nzonnu nu randi matrimognu
stritti abbrazzati com’a ddù ligari,
a facci d’i ‘mbidiusi e du demognu
e i tutti chilli chi ndi vonnu mali .
‘Na festa cu tanta genti e tanti hjuri,
parenti, amici e pur’i musicanti,
nu veru trionfu d’affettu e d’amuri
c’a benedizioni i l’angeli e d’i santi,
ma ‘u malignu è sempi llà in agguatu
e tramuta l’amuri in odiu e mali;
‘u sonnu s’avvera veramenti vviatu,
‘mbeci du matrimognu: ‘u funerali !
Na verrinata i paccìa, testa vacanti
e l’omu ‘mpreda all’odiu cchjù cocenti
cu ddù corpi turdi sa caccia davanti…
a faccia d’amuri e…d’i sentimenti !
Francesco Reitano
